یوپی روڈ ویز کی چلتی بس میں آگ، حادثہ ٹل گیا۔

دہرادون۔ بدھ کی دوپہر دہرادون سے بریلی جا رہی یوپی روڈ ویز کی بس میں اچانک آگ لگ گئی۔ حادثے کے وقت بس میں کنڈکٹر اور ڈرائیور سمیت 37 مسافر سوار تھے۔ حادثے کے بعد فائر ٹینڈرز نے بس میں لگی آگ پر قابو پانے کی پوری کوشش کی لیکن بس مکمل طور پر جل کر خاکستر ہوگئی۔ موصولہ اطلاع کے مطابق جیسے ہی یوپی روڈ ویز کی بس دہرادون میں واقع لچھی والا ٹول پلازہ سے گزری تو بس میں اچانک آگ لگ گئی۔ بس میں آگ لگتے ہی مسافروں نے چیخ و پکار شروع کردی۔ عجلت میں بس میں سوار تمام مسافروں کو اتار کر محفوظ مقام پر پہنچا دیا گیا۔
امروہہ ڈپو کی بس بدھ کی دوپہر دہرادون سے بریلی جانے کے لیے نکلی تھی۔ جیسے ہی بس میں آگ لگی، ڈرائیور نے سمجھداری کا مظاہرہ کرتے ہوئے بس کو روکا اور تمام مسافروں کو بس سے اتارا۔ ذرائع کے مطابق سب سے پہلے بس کے انجن میں آگ لگی جس کے بعد پوری بس جل گئی۔ حادثے میں کسی مسافر کے زخمی ہونے کی کوئی اطلاع نہیں ہے۔